Forvarnaverkefnið Vinátta í 1. bekk

Vinátta er forvarnaverkefni sem felst í því að fyrirbyggja einelti með því að móta góðan skólabrag, eiga góð samskipti og hafa jákvæð viðhorf til allra í hópnum.  Hugmyndafræðin sem byggir á nýjustu rannsóknum á einelti endurspeglast í eftirtöldum gildum:

Umburðarlyndi: Að viðurkenna og skilja mikilvægi og gildi fjölbreytileikans og að koma fram við alla aðra af virðingu.

Virðing: Að viðurkenna og taka tillit til allra barnanna í hópnum, að vera öllum góður félagi og virða margbreytileikann innan hópsins.

Umhyggja: Að sýna öllum börnum áhuga, samkennd, samlíðan og hjálpsemi. Að hafa skilning á stöðu annarra.

Hugrekki: Að þora að láta til sín heyra og geta sett sér mörk. Að vera hugrakkur og góður félagi sem bregst við óréttlæti.

Myndin sýnir nemendur í 1. bekk þegar þau höfðu öll fengið Blæ bangsa. En Blær er táknmynd vináttunnar, sameiginlegur vinur allra barnanna og miðpunkturinn í að byggja upp velferð og samhygð í hópnum. Blær minnir börnin á að gæta hvert annars vel og vera góður félagi. Einnig hjálpar Blær til við ýmis verkefni, faðmar, gleður og huggar. Verkefnið Vináttan er gefið út á vegum Barnaheilla.