|
Í Austurbæjarskóla
Sérstaða Austurbæjarskóla sem mótar samfélag hans er fjölmenning. Skólahverfið endurspeglar allar stéttir samfélagsins. Í skólanum er rekin móttökudeild nýbúa og í honum er töluð fjölmörg tungumál. Þar af leiðandi alast nemendur skólans upp við meiri fjölbreytileika í mannlífinu en almennt gerist á Íslandi. Þetta verður að hafa í huga þegar forvarnarstefna skólans er skoðuð. Forvarnarstefnan er hluti af almennri skólastefnu Austurbæjarskóla.
Stefna skólans
Stefna skólans tekur mið af lögum, reglugerðum, alþjóðasamþykktum, stefnu Reykjavíkurborgar í fræðslumálum og félagslegu umhverfi skólans. Öllum skal tryggt jafnrétti til náms án tillits til kyns, þjóðernis, stéttar, stöðu og trúarbragða.
Austurbæjarskóli er fjölmenningarlegur skóli þar sem stór hluti nemenda er af erlendum uppruna og af mörgum mismunandi þjóðernum. Austurbæjarskóli er skóli án aðgreiningar. Í því felst að skólastarfið er lagað að þörfum allra nemenda.
Skólinn var móðurskóli í fjölmenningarlegri kennslu og gegnir forystuhlutverki á því sviði í Reykjavík. Í skólanum er lögð áhersla á eðlilegan fjölbreytileika fólks sem endurspeglast í öllum bekkjum. Börn eru af ólíku kyni, koma frá ólíkum fjölskyldum, þau hafa ólík viðhorf, ólík áhugamál og mismunandi hæfileika. Markmið fjölmenningarlegrar kennslu er að nemendur læri að virða fjölbreytileikann og lögð er áhersla á að nýta hann á jákvæðan hátt.
Til að ná þessum markmiðum er skólinn að þróa kennsluaðferðir sem leggja áherslu á samvinnu nemenda: að sérhver nemandi hafi sinn styrkleika, að hver og einn sé virtur á eigin forsendum og að hæfileikar hvers og eins nýtist hópnum. Kennarar eiga að beita fjölbreyttum kennsluháttum með það að markmiði að nemendur verði virkir í kennslustundum og fái notið hæfileika sinna.
Skilgreining á forvörnum
Með forvörnum er lögð áhersla á uppbyggjandi lífsstíl nemenda, aukna sjálfsvirðingu, sterka framtíðarsýn, heilbrigt líferni, vandað val á félagsskap, kjark til að velja og styrk til að hafna vímugjöfum ( s.k.v. skilgreiningu Sambands íslenskra sveitarfélaga og Áfengis- og vímuvarnarráðs).
1. Markmið
Nemendur og foreldrar
• Að vekja nemendur til umhugsunar um eigin heilsu og vellíðan, um hæfileika sína, styrkleika og veikleika og styrkja með því sjálfsmynd þeirra og sjálfstraust.
• Að nemendur verði meðvitaðir um að þeir hafi val og taki ábyrgð á lífi sínu.
• Að hvetja nemendur til náms og tómstundastarfa og gera þá meðvitaða um hvaða þýðingu það hefur fyrir framtíð þeirra.
• Að styrkja félagsþroska, félagstengsl og umhyggju.
• Að fræða nemendur um leiðir til hjálpar ef þeir lenda í áföllum og erfiðleikum.
• Að nemendur viti hvert og til hverra þeir geti leitað stuðnings og hjálpar innan skólans og utan.
• Að fræða nemendur um afleiðingar og hættu af neyslu tóbaks, áfengis og annarra vímuefna.
• Að fræða og vekja meðvitund foreldra um vímuefnaneyslu, þeir fái fræðslu um einkenni neyslu, hvernig neyslu er háttað og hvernig unglingar komast yfir efnin.
• Að stuðla að samstarfi við nemendaráð varðandi málefni nemenda í skólanum.
Skólinn
• Að upplýsa kennara og annað starfsfólk skólans um siðareglur starfsmanna Reykjavíkurborgar.
• Að bæta vinnuaðstöðu kennara, nemenda og starfsmanna.
• Að skapa aðhald og stuðning í skólanum til að halda utan um nemendur hans.
• Að veita nemendum, foreldrum og starfsfólki skólans upplýsingar um skólareglur og hvernig þeim er fylgt eftir.
• Að efla félagsstarf innan skólans í samstarfi við Félagsmiðstöðina 100og1.
• Að stuðla að virku samstarfi kennara og annarra starfsmanna skólans við að fylgjast með líðan og hegðun nemenda.
• Að nota upplýsingar sem fást úr skimunum, tengslakönnunum og frá kennurum til að skoða og fylgjast með börnum og unglingum í áhættu og finna viðeigandi úrræði í samvinnu við foreldra.
• Að skólinn hafi skilgreint vinnuferli um hvernig taka skuli á vanda nemenda.
• Að skilgreind séu úrræði sem skólinn býr yfir til að mæta vanda nemenda.
• Að skipa í áfallaráð sem fylgir eftir aðgerðaáætlun vegna áfalla og kynnir hana fyrir öllu starfsfólki skólans.
• Að skipa í eineltisteymi sem fer yfir eineltisáætlun skólans út frá aðgerðaráætlun Olweusar og upplýsir annað starfsfólk um áætlunina.
• Að hafa upplýsingar um úrræði utan skólans sem nemendur og foreldrar geta leitað til.
• Að standa fyrir fræðslufundum fyrir kennara og annað starfsfólk skólans.
• Að stuðla að samstarfi milli skólans og Draumalands (dagvist eftir skólatíma).
• Að stuðla að samstarfi og upplýsingamiðlun milli skólans og leikskóla vegna nýnema.
• Að stuðla að jákvæðu og opnu samstarfi milli heimilis og skóla.
• Að stuðla að samvinnu við þá aðila sem vinna að forvörnum í sveitarfélaginu, þá sem annast menningar-, íþrótta- og tómstundastörf, kirkju, lögreglu og heilbrigðisstofnanir.
• Að skólinn verði vímuefnalaus og nemendur neyti ekki tóbaks, áfengis eða annarra vímuefna.
2. Skólastarfið
Til að ná þeim markmiðum sem stefnt er að þarf að hlúa að mörgum þáttum skólastarfs og eiga samstarf við ýmsa aðila innan og utan skólans.
Innan skólans styður hefðbundin kennsla eftir stundaskrá þessi markmið á ýmsan hátt, sem og fjölmargt annað reglubundið starf með nemendum og forráðamönnum þeirra.
Starfsumhverfi
Unnið er að því að bæta vinnuaðstöðu nemenda og kennara í skólanum. Ýmis teymi hafa starfað og komið með tillögur um úrbætur varðandi starfsumhverfi og fylgt þeim eftir.
Einnig var starfandi Mannauðsteymi til margra ára sem vann að bættri líðan starfsmanna á vinnustað í samstarfi við mannauðsráðgjafa á Fræðslumiðstöð Reykjavíkur.
Verið er að bæta mataraðstöðu nemendanna. Öllum nemendum skólans stendur til boða að fá heitan mat í hádeginu. Nemendur í unglingadeild geta keypt samlokur og ávaxtasafa í löngu frímínútum og hitað mat.
Íþróttakennarar hafa stuðlað að því að útbúa leikjaaðstöðu á skólalóð og kennt nemendum leiki. Þetta hefur skilað sér í að nemendur á öllum aldri una sér saman án árekstra á skólalóð.
Lífsleiknikennsla
Í lífsleiknikennslu skólans er byggð upp fræðsla frá fyrsta til tíunda bekkjar. Hún miðar að því að gera nemendur meðvitaða um heilsu sína og líðan með fræðsluefni um líkamann, umhirðu hans, mikilvægi næringar, svefns og hreyfingar. Áhersla er lögð á að nemendur læri að þekkja tilfinningar sínar og þarfir og leysa úr ágreiningi í samskiptum.
(Sjá kennsluáætlanir í skólanámskrá)
Í eldri bekkjum skólans er bætt við fræðslu um kynþroskann, umfjöllun um breytingar í félagslegum samskiptum, félagsþrýsting og áhrifum umhverfis á lífsstíl. Byrjað er á beinni fræðslu um skaðsemi reykinga, áfengis og annara vímuefna og um val og ábyrgð hvers og eins.
(Sjá fylgiskjal 1, dæmi um kennsluáætlun)
Lífsleikni er einnig samþætt við aðrar námsgreinar skólans eins og líffræði, íþróttaval fyrir nemendur í 9. og 10. bekk, o.fl. námsgreinar.
Fjölmenningarleg kennsla
Í fjölmenningarstefnu Austurbæjarskólans er unnið út frá þeirri hugmyndafræði að hver og einn búi yfir hæfileikum, þekkingu og reynslu sem gagnist hópnum í heild. Nemendur þurfa því að velta fyrir sér hvaða hæfileikum, styrkleikum og veikleikum þeir búa yfir og hvað og hvar þeir geta lagt sitt af mörkum. Lögð er áhersla á sjálfsábyrgð, samvinnu, samkennd, jákvætt viðhorf og víðsýni.
Mikilvægt er að gera sér grein fyrir að markmið fjölmenningarlegs skóla eru margþætt og varða alla skólamenninguna frá kennslu til samskipta. Einnig eru þessi markmið í fullu samræmi við stefnu skólayfirvalda um Skóla án aðgreiningar.
Samkvæmt skólanámskrá eru markmiðin meðal annars:
• Að þróa kennsluhætti í öllum árgöngum og námsgreinum þar sem tekið er mið af mismunandi menningarlegum bakgrunni nemenda.
• Að vinna að því að útrýma fordómum sem kunna að fyrirfinnast meðal starfsmanna eða nemenda skólans og foreldra þeirra.
• Að erlendir foreldrar verði virkir í starfsemi skólans til jafns við aðra foreldra.
• Að stuðla að jákvæðni fólks í garð nýbúa.
Helstu lögmál fjölmenningarlegrar kennslu eru:
• Að læra að takast á við fjölbreytileikann.
• Að læra samkennd og samstöðu.
• Að læra að þekkja og virða menningu annarra.
• Að vinna gegn þröngsýni og skilja hættur fordóma og rasisma.
Með kennsluaðferðum sem leggja megináherslu á samvinnu og samskipti er börnum kennt að með samvinnu áorka þau meiru og árangurinn verður betri heldur en þegar þau vinna hvert í sínu horni. Börnin eru þjálfuð í samskiptahæfni þar sem aðaláhersla er lögð á að hver og einn einstaklingur hefur eitthvað til brunns að bera sem nýtist hópnum til að leysa sameiginleg verkefni.
Með öðrum orðum: Allir eru góðir í einhverju, enginn er góður í öllu.
Námsráðgjöf
Námsráðgjafi veitir nemendum skólans m.a. ráðgjöf um náms- og starfsval og aðstoðar nemendur við að gera sér grein fyrir eigin áhugasviðum og hæfileikum. Ráðgjöfin miðar að því að nemendur öðlist þekkingu á sjálfum sér, námsleiðum, störfum og atvinnulífi til að auðvelda ákvörðun um nám eða starf að loknum grunnskóla.
Aðstoð námsráðgjafa felst m.a. í viðtölum við nemendur ásamt því að styðja við nemendur varðandi persónuleg vandamál þeirra. Einnig veitir námsráðgjafi upplýsingar um möguleika til framhaldsnáms og gefur nemendum kost á starfskynningum.
Námsráðgjafi býður nemendum upp á að taka áhugasviðskönnun sem styrkir þá við ákvarðanatöku um framhaldsnám.
Námsráðgjafi heldur utan um fjarnám nemenda og er tengiliður við atvinnutengt nám.
Aðrir þættir skólastarfsins
Ýmsir fastir liðir skólastarfsins aðrir en hefðbundin kennsla styrkja forvarnastarf skólans:
Jólaskemmtanir: Hefð er fyrir því í Austurbæjarskóla að nemendur 1.- 4. bekkja æfa atriði fyrir jólaskemmtun. Allir vinna saman og foreldrum og öðrum nemendum er boðið á sýningu í lokin.
Bekkjarskemmtanir: Lögð er áhersla á að hver bekkur skólans í 1.- 7. bekk haldi bekkjarskemmtun með foreldrum a.m.k. einu sinni á önn.
Tónlist: Samstarf er við Lúðrasveit Vesturbæjar og fram fer tónlistarnám á skólatíma innan skólans. Í lok skólaárs eru haldnir tónleikar fyrir aðra nemendur skólans.
Dans er sjálfstæð námsgrein í 1.-4. bekk. Íþróttakennarar hafa látið unglinga semja dans og sýna.
Leiklist er kennd í 4.-7. bekk.
Framsögn: Í 7. bekk er þjálfuð framsögn, meðal annars í tengslum við Stóru upplestrarkeppnina. Markmiðið er að gera nemendur meðvitaða um eigin framsögn og framkomu og styrkja sjálfstraust þeirra í að koma fram.
Útskriftarhópur: Nemendur í 10. bekk gefa út útskriftarbók þar sem saminn er texti um hvern nemanda í hópvinnu. Nemendur vinna undir stjórn umsjónarkennara en nemendur sjá sjálfir um að skipuleggja vinnuna og bera ábyrgð á útgáfu bókarinnar.
Skrekkur: Skólinn tekur árvisst þátt í Skrekk (hæfileikakeppni grunnskóla Reykjavíkur). Stór hópur nemenda í unglingadeild skólans vinnur verkefni þar sem blandað er saman tónlist, dansi og leikrænni tjáningu. Þetta reynir á sköpun, samstarf, samstöðu, framkomu, úthald og margt fleira. Starfinu lýkur með þátttöku í Skrekk-keppninni með öðrum grunnskólum borgarinnar.
Ferðalög: Markmið skólaferðalaga er að styrkja félagstengsl nemenda utan skólaumhverfis og auka tengsl nemenda og kennara. Lögð er áhersla á að gefa nemendum kost á að lækka ferðakostnað með skipulögðum fjáröflunum en þar reynir mjög á dugnað, samvinnu og útsjónarsemi þeirra.
Síðastliðin 20 á hafa verið fastar ferðir eftirfarandi:
Í 7. bekk er farið í haustferð að Reykjum.
Í 8. bekk er farið í vorferð í Hólaskóg (einnar nætur ferð).
Í 9. bekk er farið í skíðaferð (3ja nátta ferð).
Í 10. bekk er farið í vorferð að loknum samræmdu prófum (2ja nátta ferð).
Nú mun 7. bekkur fara að Laugum í Sælingsdal í apríl. Ferðir 8. og 9. bekkja eru í skoðun. 10. bekkur heldur sinni ferð.
Félagsmiðstöð ÍTR, 100og1 á vegum Kamps, er rekin innan skólans. Vorið 2003 hófst á vegum hennar vinna með hópa unglinga sem eiga erfitt með að tengjast félagslega. Í samstarfi við kennara, námsráðgjafa, deildarstjóra nýbúa og félagsmiðstöð er leitað þeirra nemenda sem gætu þurft slíkan stuðning og þeim boðin þátttaka með samþykki foreldra þeirra. Þessir hópar starfa einnig yfir sumartímann.
3. Samstarf við foreldra
Foreldradagur: Einu sinni á önn eru foreldrar og börn þeirra boðuð til viðtals við kennara skólans og aðra starfsmenn ef þess er óskað.
Ef nemandi á við sértækan vanda að stríða er lögð áhersla á að byggja upp samstarf við foreldra/forráðamenn um lausn á vandanum. Í sumum tilvikum eru haldnir reglulegir samráðsfundir með foreldrum/forráðamönnum ásamt umsjónarkennara og þeim fagaðila/aðilum sem koma að málinu til að halda uppi markvissri eftirfylgni.
Námsefniskynningar: Á haustin eru haldnar námsefniskynningar og upplýsingum miðlað til foreldra um skólastarfið, skólareglur og hvaða kröfur eru gerðar til nemenda og foreldra/forráðamanna. Í unglingadeild er kynnt hvernig fylgst er með skólasókn og ástundun í Mentor. Foreldrar fá upplýsingar um mætingar vikulega.
Foreldrar nýbúa: Vegna þess hversu margir nemendur af erlendum uppruna eru í skólanum getur verið vandi að miðla upplýsingum um skólastarf vegna tungumálaörðugleika. Veittar eru upplýsingar um skólastarf til nýrra foreldra á fundum með kennurum nýbúadeildar. Þar er farið í gegnum skóladagatal, skólareglur, stundaskrá og öll helstu atriði sem varða skólagöngu barnsins. Á þessum fundum er boðið upp á túlkaþjónustu ef þörf krefur.
Á foreldradögum er boðið upp á túlkaþjónustu sé þess þörf. Foreldrafélag skólans hefur látið þýða tilkynningar um viðburði á vegum félagsins á nokkur tungumál. Þarna er um að ræða t.d. jólaföndur og vorskemmtun.
Foreldrafélag: Við skólann starfar foreldrafélag. Á hverju ári eru kosnir tveir foreldrar sem bekkjarfulltrúar hvers bekkjar. Foreldrafélagið stuðlar að því að styrkja samband foreldra og nemenda utan skólatíma t.d. með bekkjarskemmtunum, jólaföndri, öskudagsgleði og vorhátíð foreldrafélagsins.
Skólaráð: Í skólaráði skólans sitja tveir fulltrúar foreldra, tveir fulltrúar nemenda, tveir fulltrúar kennara, einn fulltrúi annarra starfsmanna, skólastjóri og verkefnastjóri félagsmiðstöðvar. Ráðið er samstarfsvettvangur skólastjóra og skólasamfélags um skólastarf. Það tekur þátt í stefnumörkun skólans, fjallar um skólanámskrá, árlega starfsáætlun, rekstraráætlun og aðrar áætlanir. Það fær til umsagnar allar áætlanir um um meiriháttar breytingar á skólahaldi og fylgist almennt með öryggi, aðbúnaði og almennri velferð nemenda.foreldrum.
4. Grenndarsamvinna
SAMAUST: Skipulegt samstarf er milli skólans, lögreglu, félagsmiðstöðvar ÍTR og Þjónustumiðstöðvar Miðborgar og Hlíða um málefni barna og unglinga í skólahverfinu. Fundir eru haldnir mánaðarlega á starfstíma skólans. Fundina sitja aðstoðarskólastjóri, námsráðgjafi, deildarstjóri unglingadeilda og verkefnastjóri nýbúadeildar fyrir hönd Austurbæjarskóla, unglingaráðgjafi Þjónustumiðstöðvar Miðborgar og Hlíða, hverfislögreglumaður borgarhluta 1 og verkefnastjóri ÍTR í Félagsmiðstöðinni 100og1. Markmið fundanna er að treysta samvinnu og samstarf stofnananna, miðla upplýsingum og fylgjast með stöðu barna og unglinga í hverfinu með úrræði og úrbætur í málefnum þeirra í huga.
Vinnuskóli Reykjavíkur: Nemendur í unglingadeild sem átt hafa í erfiðleikum í skóla t.d. í námi, mætt illa, átt í félagslegum erfiðleikum og eiga jafnvel í vímuefnavanda, eiga kost á tilboði sem felur í sér sambland náms og vinnu. Þetta tilboð felur í sér samning um stundaskrá sem samsett er af námi í skóla og vinnu utan hans. Vinnuskólinn útvegar vinnu í allt að 16 klukkustundir á viku og greiðir laun fyrir. Deildarstjóri námsvers og námsráðgjafi sjá um að útbúa stundaskrá eftir þörfum þess nemanda sem við á. Skilyrði samnings er full mæting í vinnu og í skóla. Námsmat felur í sér umsögn fyrir vinnuna.
Adrenalín: Adrenalín gegn rasisma er samstarfsverkefni Lauganeskirkju, Laugalækjarskóla og Austurbæjarskóla. Markmiðið er að vinna gegn fordómum og skapa virðingu milli unglinga af ólíkum uppruna. Unglingar úr móttökudeild fyrir nýbúa í Austurbæjarskóla og unglingar úr 9. og 10. bekk Laugalækjarskóla taka þátt í þessu verkefni. Í hópnum eru bæði stelpur og strákar. Starfið er byggt bæði á fræðslu og skemmtun. Hópurinn hittist vikulega. Boðið er upp á tvö ferðalög á tímabilinu.
Hættu áður en þú byrjar: Í 8.og 9. bekk er rekin fræðsla á vegum forvarnarfélagsins Hættu áður en þú byrjar sem er samstarfsverkefni lögreglunnar í Reykjavík, Félagsþjónustunnar í Reykjavík og Marita á Íslandi, sem er forvarnarsvið Samhjálpar. Félagið hefur verið með fræðslu um skaðsemi fíkniefni frá 1998.
Sýndu sjálfstæði, segðu nei, fyrir nemendur í 8. bekk og foreldra þeirra.
Hættu áður en þú byrjar, fyrir nemendur í 9. bekk og foreldra þeirra.
Skólaheimsókn Lögreglunnar: (Sjá námsáætlanir í lífsleikni).
Íþróttafélagið Valur kynnir reglulega starfsemi sína innan skólans og hvetur til þátttöku.
Skátarnir kynna einnig starfsemi sína og hvetja til þátttöku.
Hallgrímskirkja. Á haustin kynnir æskulýðsfulltrúi Hallgrímskirkju fyrir nemendum skólans þá starfsemi sem er í boði á vegum kirkjunnar. Æskulýðsfulltrúinn er í miklu samstarfi við starfsmenn Draumalands varðandi þátttöku yngri nemenda skólans í starfi kirkjunnar. Auk þess býður kirkjan upp á skipulagða starfsemi fyrir börn á aldrinum 10-12 ára, starf sem snýr að fermingarbörnum og fjölbreytt starf með unglingum þar sem m. a. er boðið upp á leiðtoganámskeið. Á vegum kirkjunnar eru starfandi barna- og unglingakórar sem að verulegu leyti byggjast upp á þátttöku nemenda skólans.
5. Almennt forvarnastarf
Í samstarfi við Menntasvið Reykjavíkur og Leikskóla Reykjavíkur er leitað eftir upplýsingum um þau börn sem koma ný í skólann vegna þeirra sem gætu þurft eftirfylgd og sérstök úrræði í skólanum.
Forvarnarstarf byrjar strax í yngstu bekkjunum. Á hverju hausti eru lagðar fyrir ákveðnar prófanir til að kanna stöðu nemenda í 1. bekk. Þessar upplýsingar gefa vísbendingar um börn sem fylgjast þarf með og aðstoða sérstaklega. Vandi þeirra er skilgreindur, leitað er frekari greiningar ef þörf er á frá viðurkenndum greiningaraðilum og fundin viðeigandi úrræði. (Sjá nánar í skólanámskrá).
Námsráðgjafi fleggur yrir félagstengslakannanir á haustönn í samvinnu við umsjónarkennara. Félagstengslakannanir geta gefið vísbendingar um nemendur sem hugsanlega eiga í vanda. Hægt er að bjóða þeim einstaklingum upp á viðtöl til að skoða stöðu þeirra eða vísa í önnur úrræði ef þörf er á.
Mentor. Fylgst er með mætingum nemenda í Mentor. Kennarar bera ábyrgð á því að skrá inn mætingarnar. Umsjónarkennarar halda utan um upplýsingarnar og senda foreldrum þær vikulega. Mætingar eru mikilvægar því þær gefa upplýsingar um ástundun náms og einnig um líðan eða ástand barna og unglinga. Einnig um aðbúnað og aðhald heimilisins.
Deildarfundir: Haldnir eru reglulega árganga- og deildarfundir þar sem kennarar skólans geta rætt um mál sem upp koma meðal nemenda.
Nemendaráð: Í nemendaráði sitja tveir nemendur úr hverjum bekk í 8., 9. og 10. bekk. Í samstarfi við nemendaráð er unnið að málefnum unglinga í skólanum. Nemendaráð er í samstarfi við Félagsmiðstöðina 100og1 sem hefur aðsetur í skólanum. Tveir fulltrúar nemendaráðs eiga sæti í skólaráði.
Samkvæmt stefnu í fræðslumálum í borgarhluta 1 hafa verið stofnuð nemendaráð á miðstigi grunnskólanna til að auka nemendalýðræði.
Áfallaráð: Skólinn hefur útbúið aðgerðaráætlun um viðbrögð gagnvart nemendum og starfsfólki við hinum ýmsu áföllum sem yfir geta dunið.
(Sjá heimasíðu skólans).
Eineltisteymi: Skólinn er þátttakandi í Olweus-aðgerðaráætluninni gegn einelti. Í þeirri áætlun felst virk samvinna heimilis og skóla í forvörnum gegn einelti og viðbrögðum við einelti ef það kemur upp.
(Sjá nánar á heimasíðu skólans).
6. Íhlutun
Vinnuferlar: Ef vandi kemur upp er unnið eftir ákveðnu vinnuferli mála.
(Sjá ferilblað á heimasíðu). Ef kennari í samstarfi við foreldri/foreldra getur ekki leyst vanda nemandans er næsta skref samkvæmt vinnuferli að vísa málinu í ráðgjafanefnd.
Ráðgjafarnefnd: Í ráðgjafarnefnd sitja aðstoðarskólastjóri, deildar- og verkefnastjórar, þroskaþjálfi og atferlisfræðingur.
Fundað er vikulega. Hlutverk ráðgjafanefndar er að vera kennurum, foreldrum og öðrum starfsmönnum skólans til ráðgjafar í málum sem varða námsvanda nemenda, hegðun og félagslegan vanda. Markmið með ráðgjöf nefndarinnar er að leysa mál þannig að nemandi geti haldið áfram árangursríku námi í getublönduðum bekk. Nefndinni er líka ætlað að finna önnur úrræði innan skólans ef lausnir í almennum bekk eru fullreyndar. Nefndin boðar á fund sinn þá sem hún telur eiga erindi hverju sinni. Ráðgjafanefndir geta vísað í úrræði innan skólans.
Ef ekki tekst að leysa vandann á þessu stigi er málinu vísað til
nemendaverndarráðs.
Nemendaverndarráð: Í nemendaverndarráði sitja aðstoðarskólastjóri sem stýrir fundunum,umsjónarmenn stig, námsvera, námsráðgjafi, skólasálfræðingur og skólahjúkrunarfræðingur.
• Haldnir eru vikulegir fundir á starfstíma skólans.
• Hlutverk nemendaverndarráðs er að fjalla um vanda einstakra nemenda og finna leiðir til úrbóta fyrir þá.
• Nemendaverndarráð vísar málum í úrræði utan skólans.
• Nemendaverndarráð á einnig að stuðla að jákvæðu námsumhverfi fyrir
nemendur og huga að alhliða velferð þeirra.
• Nemendaverndarráð tekur til umfjöllunar rannsóknir og kannanir sem gerðar eru til að varpa ljósi á stöðu barna og unglinga í dag (t.d. Börnin í borginni). Slíkar upplýsingar geta verið gagnlegar til að skoða mál barna og unglinga í Austurbæjarskóla og til að meta þá framtíðarsýn sem skólinn stefnir að.
Einelti : Fylgt er aðgerðaráætlun Olweusar ef upp kemur grunur um einelti í skólanum. Olweusar áætlunin er þróunarverkefni í Austurbæjarskóla. Það byggir á fræðslu til allra starfsmanna skólans um einelti. Samfara fræðslunni fer fram endurskoðun á félagslegu umhverfi í skólanum. Niðurstaðan á að verða skólaumhverfi sem einkennist af:
• Hlýju og hlutdeild fullorðinna.
• Virku eftirliti fullorðinna í skólanum og á skólalóðinni. Gert var vaktaskipulag fyrir starfsmenn til að fylgst verði með skólalóð, göngum og salernum á skipulegan hátt.
• Föstum römmum vegna óviðundandi atferlis.
• Viðurlögum vegna óviðunandi atferlis.
• Virkri hlutdeild nemenda með t.d. föstum bekkjarfundum. Gerðar hafa verið sérstakar bekkjarreglur gegn einelti. Sjá nánar á heimasíðu skólans.
Úrræði skólans:
Námsver barna (1. - 7. bekkur)/ Námsver unglinga:
Umsjónarmenn námsvera fylgja eftir sérkennsluáætlun skólans.
Sérkennarar veita ráðgjöf við gerð einstaklingsnámsskrár.
Þeir veita ráðgjöf ásamt öðrum fagaðilum skólans í atferlismótun.
Deildarstjóri barnastigs stýrir skimum 6 ára barna.
Deildarstjóri barnastigs sér um lestrarskimum á barnastigi.
Skólasálfræðingur:
Skólasálfræðingur sinnir nemendum sem eiga í sálrænum og félagslegum erfiðleikum þar sem þessir erfiðleikar hafa áhrif á nám og aðlögun í skóla. Inngrip sálfræðings felur m.a. í sér athugun og mat á þroska, hegðun og líðan nemandans samkvæmt niðurstöðum úr viðtölum, sálfræðilegum prófum, bekkjar- og atferlisathugunum. Hann gerir tillögur til úrbóta og tekur þátt í gerð áætlana um aðstoð við einstaka nemendur í samvinnu við fulltrúa í nemendaverndarráði, kennara og foreldra. Sálfræðingur getur boðið upp á skammtímameðferð í einstaka tilfellum.
Hjúkrunarfræðingur:
Skólaheilsugæslan er á vegum Heilsugæslustöðvar Miðbæjar. Hjúkrunarfræðingur er trúnaðarmaður barnanna og talsmaður þeirra í skólanum. Í samvinnu við foreldra er stefnt að því að gera börnin ábyrg fyrir eigin heilsu í framtíðinni. Hjúkrunarfræðingur sinnir föstum liðum í almennri heilsugæslu svo sem að fylgja eftir reglubundnum skoðunum og bólusetningum á börnum. Hjúkrunarfræðingur skráir í gagnagrunn heilbrigðismála allar greiningar sem gerðar eru á börnum af hendi lækna, sálfræðinga eða annarra greiningaraðila.
Þjónustumiðstöð Miðborgar og Hlíða:
Samstarf er við Þjónustumiðstöð um stuðning við nemendur og fjölskyldur þeirra.
Talmeinafræðingur:
Talmeinafræðingur sinnir greiningu, þjálfun og ráðgjöf. Hann leggur fyrir skimun fyrir alla 6 ára nemendur að hausti, gerir nánari úttekt á stöðu þeirra nemenda sem greinast með málþroskafrávik í skilningi, framburði eða öðrum þáttum tjáningar, gerir greiningu á íslenskukunnáttu nýbúa og athugun á íslenskukunnáttu tví-/margtyngdra nemenda við skólann. Verkefni talkennara tengist þjálfun barna með erfiðleika í framburði, seinkaðan málskilning og stam.
Stuðningsfulltrúar:
Stuðningsfulltrúar eru kennurum til aðstoðar við að sinna einum eða fleiri nemendum sem þurfa sérstaka aðstoð. Starfið miðar fyrst og fremst að því að auka færni og sjálfstæði þessara nemenda, félagslega, námslega og í daglegum athöfnum.
Skólaliðar:
Skólaliðar taka þátt í uppeldisstarfi og öðrum störfum sem fram fara innan skólans. Þeir gegna mikilvægu hlutverki í framkvæmd aðgerðaráætlunar Olweusar gegn einelti þar sem þeir fylgja eftir eftirliti samkvæmt vaktaaskipulagi á skólalóð, göngum og salernum.
Önnur úrræði sem skólinn getur vísað í:
• Þjónustumiðstöð Miðborgar og Hlíða
• Fjölskyldumiðstöðin við Barónsstíg
• Lausn, fjölskylduráðgjöf
• Barnaverndarnefnd
• BUGL
• Greiningarstöð ríkisins
• Menntasvið Reykjavíkur
• Ráðgjafi Menntasviðs um samskipti heimila og skóla
• Stuðlar
• Lögreglan
|
